محمد عطية: تيار الإسلام السياسي أكتر من أذى الثورة وهذه هي الدروس المستفادة من اليوم

اعتبر الفنان محمد عطية، أن تيار الإسلام السياسي هو أكثر من أذى الثورة، مشيرًا إلى أن الجيش جاهز للتظاهرات، وليس له علاقة بالحدود.

 

وكتب عطية، في تدوينة له على موقع التواصل الاجتماعي "فيس بوك"، تحت عنوان "الدروس المستفادة من اللى حصل النهاردة":

١- إستعراض قوة للجيش أشبه بإحتفالات أكتوبر .. إحنا جاهزين للتظاهرات بشراسة بس الحدود مالناش دعوة بيها.
٢- إستمرارية غباء أغلب تيار الإسلام السياسى .. إحنا ضد الظلم اللى بيحصل دلوقتى بس مش لله فى لله كده .. لأ عشان نعمل دولة طائفية نظلمكوا فيها علي مزاجنا .
٣- ظهور أغلب اللى مش داعش بس بيحترموهم على الأكاونت عندى من خلال مهاجمتى لدولة الخلافة الكام يوم اللى فاتو ..
٤-التأكد من إن تيار الإسلام السياسى أكتر تيار مؤذى للثورة .. إما بتحالفاته مع السلطة أو إستخدام السلطة ليه ولغبائه كشماعة لتعليق فشلها و قمعها وظلمها عليها .. القمع والظلم اللى بيطوله هو شخصيا .. و برضه مابيتعلمش
٥- تأكيد على ظاهرة إنتقال الفاشية من السلطة لأغلب المؤيدين عن طريق إعلامنا اللطيف .،بالنسبة ليهم مش مشكلة إن أى حد ينزل يموت حتى لو كان سلمى ..
٦- قتل فكرة الإعتراض بالتظاهر لو مبارك خد براءة بكره ..
٧- فرصة جديدة للسلطة تصحى الوطنية البدائية عند المؤيد عشان الناس اللى كانت بدأت تاخد بالها إن البلد بايظة و الإرهاب بيزيد وإن مافيش أي رؤية يرجعوا يقولوا تحيا ماسر
٨- ناس قالولى إتصدمنا فيك ماكناش فاكرينك كده وواحد قاللى بالنص ( إنت طلعت ملحد زى وائل عباس ) آه والله قاللى كده .. معلش ماهو إنت مش قادر تستوعب إن دفاعى عن المظلوم غير دفاعى عن فكر المظلوم .. زيك زى المؤيد بالظبط فى النقطة دى ..نظرية إنت معانا ولا معاهم ؟؟
٩- من سنة تقريبا و الشتايم اللى بتتقال لأى معارض بتنحصر بين ممول و شاذ و خاين .. و كنت بدأت أقلق على ألقاب المرتد و عدو الدولة الإسلامية وفلول و جمل زى ( ماذا رأيتم من الله حتى تكرهوا شريعته ) اللى كانت إختفت و الحمد لله ظهرت تانى إمبارح على لسان مؤيدين تيار الإسلام السياسى .. وحشتونى ..وحشتونى .. وحشتوووووونى".